Musik: H. Knipp, Bläck Fööss
Text: H. Knipp
Verlag: Paveier Musikverlag
Jahr: 1989
1. Hellichovend kom eran, d'r Papp, dä wor op Jöck,
de Mamm hatt üvverall jesök un sat: "Wo es dä Jeck?"
Do feel ihr en, hä mot jo noch e Bäumche kaufe jon,
op Hellichovend, typisch Schäng, wä wollt, sollt dat verston.
2. Et wooten vier, et wooten fünf, de Dämmerung trok ald op,
do kom jet Kleines, krumm un scheif, de Stroß zom Hus erop.
Ich hatt en dann als eets erkannt un reef:"Et Bäumche kütt!"
De Mamm, die sat, als sie et soch:"Mein Jott, dat jitt et nit!"
Refrain:
Unser Bäumche, oh Tannenbaum,
unser Bäumche, dat wor nen Draum!
Unser Bäumche verjeß ich nie,
nä su ne schöne Baum wie dä, krijje mer niemols mih.
3. Dä Papp, dä wor janz stolz un sat:"Es dä nit wunderschön?"
De Mamm, die wor am laache:"Jo winnichstens es hä jrön."
Dat Bäumche wor noch nit ens huh, dofür unheimlich krumm.
De Mamm, die sat:"Dat scheife Ding, dat kriß de nie zom Ston."
4. D'r Papp janz drüsch:"No waat ens af, hä es jo noch janz rüh;
wenn do eets alles dran es, erkenns de dä nit mih."
Dat Bäumche links, en Fläsch Schabau rächs unger'm Ärm jeklemmp,
dat wor et letzte, wat ich soh, als hä en et Zemmer jing.
Refrain:
Unser Bäumche, oh Tannebaum...
5. Die Dür, die schloß hä immer af, et durf im keiner ren,
denn keiner sollt dat Wunder, dat do passierten, sin.
Zoeets wor hä am säje, dä Baum wor doch esu klein,
dann hoot mer‘n plötzlich näle, ich daach, dä Baum jing en.
6. En Zick lang wor et dann janz stell, kei Tönche us dem Raum,
op eimol hot mer‘n singe, janz laut:"Oh Tannenbaum."
Ich jläuv, jetz dät hä en schmöcke met Jlöckcher un esu;
"Es ist ein Ros entsprungen" kom falsch un vill ze huh.
Refrain:
Unser Bäumche, oh Tannebaum...
7. Op eimol jov et dann enen Knall, jetz wood et furchbar stell.
"Zu Betlehem jeboren" kom leis met vill Jeföhl.
Noh zwei Stund kom‘e endlich rus, et Schlemmste wor jedonn
ich luurt en an, hä sat och jet, ich kunnt en nit verston.
8. Öm aach Uhr wor Bescherung, d'r Papp wie immer fit,
en singem beste Anzoch, de Mamm em schwatze Kleid.
Hä dät mem Jlöckche lügge, dann sunge mer e Leed,
un sochen dann dat Bäumche met Kääze en d'r Eck.
Refrain:
Unser Bäumche, oh Tannebaum...
9. Et wor noch kleiner als vürher, doch wirklich wunderschön,
stund kääzejrad un nit mih krumm, ein Wunder war jeschehn.
Ich hatt e Rädche kräje, mingen allerjrößten Draum,
dann jov et Ovendesse unger däm schöne Baum.
10. Wat ich dann eets vill späder vun im erfahre han,
vum Papp, dä hück nit mih met uns Chreßdaach fiere kann;
dat wat ich för e Wunder heelt, wor'n zwei Näl en d'r Wand,
vun do en Kood rund öm d'r Baum, dröm hatt hä feste Stand.
Refrain:
Unser Bäumche, oh Tannebaum...